Habang naliligo sa Tayabas bay
TOTOY TINAMAAN NG KIDLAT, TODAS

HINDI nakaligtas sa kamatayan ang isang 11-anyos batang lalaki matapos tamaan ng kidlat habang naliligo sa Tayabas Bay, Brgy. Dalahican, sa lungsod ng Lucena, lalawigan ng Quezon, nitong Lunes ng hapon, 14 Agosto.

Kinilala ng pulisya ang biktimang si John Alexander Ballon, 11 anyos, isang Grade 5 student, at residente sa nabanggit na barangay.

Ayon sa ina ng biktima, lumalangoy sa Tayabas Bay ang biktima dakong 3:00 pm kamakalawa nang biglang tamaan ng kidlat ang kanyang anak.

Dinala ang biktima sa Saint Anne General Hospital kung saan siya idineklarang dead on arrival.

Ayon sa pulisya, sasailalim sa post-mortem examination ang biktima upang matukoy ang sanhi ng kanyang kamatayan. ###