HATAW! D'yaryo ng Bayan hatawtabloid.com
APAT miyembro ng isang pamilya ang namatay sa nasusunog na dalawang-palapag na bahay sa Santa Maria, Bulacan kahapon ng madaling araw, 8 Agosto.
Kinilala ang mga biktimang sina Roy Lozano, 41 anyos, ang padre de familia; Marie Lozano, 39, ang kanyang asawa; Cedric Lozano, 13, anak na panganay; at Andrei Lozano, 12, bunsong anak, pawang naninirahan sa Block 9, Lot 5, Pueblo del Rio, Brgy. Caypombo, Santa Maria, Bulacan.
Napag-alamang nasa ikalawang palapag ng bahay ang natutulog na mga biktima na na-trap at hindi nakalabas nang magsimula ang sunog na kanilang ikinamatay.
Nakaligtas sa trahedya ang isang alyas Mamita dahil sa ibaba ng bahay siya natutulog kaya nakalabas kaagad habang nagaganap ang sunog.
Sa ulat ni Fire Chief Jonathan Hungriano, Jr., ng Santa Maria Bureau of Fire Protection, nagsimula ang sunog sa two-storey residential building na tinitirahan ng mga biktima dakong 3:17 ng madaling araw.
Dakong 3:22 am nang makarating sa lugar ang mga bombero ng Santa Maria at iba pang rescuer mula sa kalapit barangay at bayan hanggang ganap na maapula ang sunog dakong 3:51 am. Isinusulat ang balitang ito’y patuloy ang pag-iimbestiga ng mga awtoriad para malaman ang sanhi ng sunog habang ang labi ng mga biktima ay dinala na sa punerarya.
(MICKA BAUTISTA)
