2 produkto ng Cosmo pageant aarte sa Finding Daddy Blake, rarampa sa Beyond Fashion Manila 

HARD TALK
ni Pilar Mateo

BANGGITIN mo ang salitang “Taklobo” matatawa ang mag-asawang Marc Cubales at Joyce Peñas Pilarsky. Mapapa-iling.

Pero out of the question na muna raw ang mga isyung may kinalaman doon sa pinagdaanan nila.

This time,  gusto na ni Marc bilang producer na maipalabas na ang sinimulan ni direk Jay Altarejos na Finding Daddy Blake na tatapusin niya at ni direk Frank Lloyd Mamaril.

May mga kinailangan lang silang plantsahin sa mga eksena sa istorya tungkol sa kontrobersiyal na personalidad na umano’y bumibiktima sa maraming kalalakihan sa mga kinunan nitong video at lumabas sa social media.

Dahil nagpapalaganap din ng mga pageant at fashion shows sina Marc at Joyce, dalawang fresh from their Cosmopageant ang papaimbulugin sa nasabing pelikula.

Raw talents at walang  mga karanasan sa pag-arte ang napa-arte sa iniatang na mga role sa kanila.

Sina Simon Abrenica at Curt del Rosario.

Panalo na sa following at subscribers nila sa TikTok at iba pang social media apps ang dalawa. Kaya nga ngayon pa lang, nakaabang na ang  mga tagasubaybay nila sa gagawin ng dalawa sa kontrobersiyal na pelikula. Kung hanggang saan ba ang ibibigay nila sa hihilingin sa kanila.

Proud naman si Marc sa pagsasabing hindi naman sila nagkamali sa pagpili kina Simon at Curt.

Mga kontesero sa pageants. Tiktokerist. Modelo. Ngayon, artista.

Rarampa rin sila sa pinaka-bonggang fashion event na ima-mount ni Joyce sa Okada this coming September 14, 2023 sa Beyond Fashion Manila: A Charity Gala.

‘Di naman makalilimutan ni Joyce ang proyekto dahil siya ang huling nag-pictorial sa fascade ng Post Office bago ito tinupok ng apoy.