HATAW! D'yaryo ng Bayan hatawtabloid.com
TINIYAK ni Pangulong Ferdinand R. Marcos, Jr., na patuloy na magtatrabaho sa pagtatatag ng mga koneksiyon sa internet sa mga liblib na lugar sa bansa ang kanyang administrasyon dahil naging pangunahing pangangailangan sa sa post-pandemic ang pag-access sa web.
Inihayag ito ni Marcos Jr., nang ‘mag-gatecrash’ siya sa isang Zoom call sa pagitan ng Department of Information and Communications Technology (DICT) at ng mga stakeholder ng ahensiya.
“Gusto kong subukan kung talagang sinasabi sa akin ni Sec. Ivan (John Uy) e talagang gumagana,” sabi ni Marcos na tinawag ang sarili bilang ‘gatecrasher’ sa Zoom call.
“Mukha namang marami na tayong nalagyan ng bagong connection para may internet na sila ngayon… Lalo na ‘yung malalayo dahil mas may kailangan, lalo na ‘yung mga bata para sa kanilang eskuwela,” aniya.
“Umpisa pa lang ito. Gagawin natin ito para masabi natin, lahat ng Pinoy kayang kausapin lahat ng ibang Pinoy,” dagdag niya.
Binati ni Marcos ang DICT para sa libreng WiFi na proyekto nito at sinabi kamakailan, na ang mga koneksyon na inilagay ng ahensiya ay ‘gumagana nang maayos.’
“Yung iba’t ibang lugar nagkaroon na ng internet kaya’t dadagdagan pa natin,” sabi ng Pangulo.
“Buti na lang maraming bagong teknolohiya na puwede nating gamitin na we are taking advantage of para naman sa buong Filipinas ay makaramdam tayo ng connectivity at napakaimportante ngayon niyan,” aniya.
Ang BroadBand ng Masa Project (BBMP) ng DICT ay naglalayong maglunsad ng libreng WiFi connections sa malalayong lugar sa bansa.
Nauna nang kinuha ng gobyerno ng Filipinas ang Starlink ni Elon Musk para tumulong sa pagbibigay ng mga serbisyo sa internet sa mga lugar sa kanayunan.
Batay sa ulat ng DICT, 4,757 live sites ang na-activate sa 17 rehiyon, 75 probinsiya at National Capital Region sa ilalim ng digitalization initiative ng gobyerno.
Dagdag ito sa 606 lungsod at munisipalidad na sumailalim sa digitalization.
Noong Oktubre 2022, halos 30 porsiyento ng 110 milyong populasyon ng Filipinas ang walang access sa internet, ayon sa datos ng gobyerno. (ROSE NOVENARIO)
