HATAW! D'yaryo ng Bayan hatawtabloid.com
AGAD namatay ang dalawang lalaki habang sugatan ang dalawang iba pa nang paulanan sila ng bala ng apat na hindi kilalang mga suspek sa isang karinderya sa National Highway, sa Brgy. Sto. Niño, sa bayan ng Tunga, lalawigan ng Leyte, nitong Linggo, 4 Disyembre.
Kinilala ang mga napaslang na biktimang sina Benjamin Balais at Ace Sonorio, kapwa mga residente sa kalapit na bayan ng Barugo, sa naturang lalawigan.
Samantala, sugatan ang manager ng establisimiyento na si Jastine Cello, at Mary Jean Lucelo, kahera.
Nabatid na apat na kalalaking pawang may suot na bonnet at sakay ng isang SUV ang bigla na lamang dumating dakong 2:40 pm saka pinagbabaril ang mga biktimang kumakain sa karinderya.
Huli sa kuha ng CCTV camera ang mga suspek na bumaba ng sasakyan at saka tumakas patungo sa bayan ng Carigara.
Dinala ang mga sugatang biktma sa pagamutan habang inalerto ng lokal na pulisya ang iba pang mga himpilan sa lalawigan upang matukoy ang kinaroroonan ng mga suspek.
