Robi may ‘patama’ kay Zeinab—Akala mo lang wala, pero MERON, MERON, MERON! 

MA at PA
ni Rommel Placente

DAMAY si Robi Domingo sa nangyayaring bangayan ngayon kina Zeinab Harake at Wilbert Tolentino.  Sa pagsasalita kasi ni Wilbert via Facebook Live, inilabas niya ang screenshot messages umano sa kanya ni Zeinab noong maganda pa ang kanilang samahan.

Hiningan kasi ni Wilbert ng payo si Zeinab tungkol sa mga artistang nais maka-collab ng talent manager. Kabilang dito sina Ivana Alawi, Alex Gonzaga, Sanya Lopez, at Robi.

Mababasa sa screenshots na ibinulgar ni Wilbert na hindi magaganda ang mga sinabi ni Zeinab ukol sa mga artistang ito, katulad ng kay Robi.

Ito ang sinabi ni Zeinab ukol kay Robi (published as is): “wag ung robi domingo ha walang market dun maloka ka dun shhh lang.”

Nakarating kay Robi ang sinabing ito ni Zeinab sa kanya. At sa kanyang Twitter account ay may  cryptic tweet ang TV host.

“Oh wow. How true?” tweet ni Robi, na nilagyan pa nito ng makahulugang emojis.

Sinundan pa ito ni Robi ng mas malamang post sa Instagram at Twitter.

INi-repost niya ang larawan ng gusali ng isang public market.

“ROBI DOMINGO PUBLIC MARKET,” sabi sa edited signage.

Ang caption dito ni Robi: “Akala mo lang wala, pero MERON, MERON, MERON! [crying emojis]” na dialogue ni Carlo Aquino kay Vilma Santos sa movie nila noon na Bata, Bata, Paano Ka Ginawa, na gumanap sila rito bilang mag-ina.

Malinaw na sarkastikong reaksiyon ito ni Robi sa pahayag ni Zeinab na wala siyang market.

In fairness naman kay Robi, may market siya, huh! In fact, milyon ang followers niya sa kanyang Instagram at Twitter account.

Nang makarating kay Zeinab ang reaksiyon ni Robi ay humingi siya ng sorry dito, na idinaan niya sa kanyang social media account. Pero wala pang reply si Robi. 

Halatang nasaktan siya sa sinabi ni Zeinab laban sa kanya.