HATAW! D'yaryo ng Bayan hatawtabloid.com
NAGPASALAMAT na ligtas si dating Sen. Leila De Lima sa tangkang pag-hostage sa kanya sa Philippine National Police Custodial Center nitong Linggo ng umaga, desmayado si Sen. Robinhood “Robin” C. Padilla sa diskriminasyon na ipinakita ng ilang pulis na nagresponde sa sitwasyon.
Iginiit ni Padilla, hindi tama ang paggamit ng salitang “Muslim” bilang pantukoy sa mga nagtangkang mag-hostage sa dating mambabatas – at dahil dito, nanawagan siya sa PNP leadership na magkaroon ng edukasyon sa paggamit ng salitang Muslim.
“Ako ay nananawagan sa Philippine National Police na magkaroon ng edukasyon sa paggamit ng salitang Muslim. Discrimination po ito kapag binibigkas ng pulis na ito ang salitang Muslim. Maging parehas po tayo ng trato sa bawat Filipino,” aniya sa kanyang Facebook account.
“Kapag may kidnapper o holdaper o pumatay ng tao hindi man n’yo sinasabi na Kristiyano ito,” dagdag ng mambabatas.
Pinunto ni Padilla ang kumalat na video sa social media kung saan inilarawan ng mga pulis na nagreresponde na “Muslim” ang mga hostage-taker.
Iginiit niyang hindi ginagamit ang salitang Muslim sa pag-identify ng isang tao, lalo’t may kinalaman sa krimen o terorismo.
“Mainam po na identify ninyo po sila hindi sa kanyang religion dahil walang kinalaman ang religion po rito. Ang batas ay hinubog sa anyo ng hustisya at ipinapatupad ito ng alagad ng batas. Kung ang alagad ng batas ay humusga ng bansag sa isang religion para saan pa po ang babaeng nakapiring ang mga mata at may hawak na timbangan?” aniya.
Nanawagan si Padilla kay PNP Chief P/Gen. Rodolfo Azurin Jr., na pangaralan ang kanyang tauhan.
Diin ni Padilla, ipinagpapanalangin ng mga Muslim ang pagbuti ng kalagayan ng nasugatan na pulis, at ang patuloy na kaligtasan ni De Lima.
“Ipinagpapanalangin po ng mga Muslim ang kagyat na pagbuti ng kalagayan ng nasugatan na bayaning pulis at ganoon din po ang katahimikan ng loob at ang patuloy na kaligtasan ng dating senador na Leila de Lima,” aniya. (NIÑO ACLAN)
