Mag-utol timbog sa panloloob sa e-bikes shop

BULILYASO ang dalawang lalaking mag-utol nang mahuli ng mga awtoridad habang nagnanakaw sa isang e-bikes shop sa Las Piñas City, Lunes ng madaling araw.

Kinilala ng pulisya ang mga dinakip na sina Marvin Torion, 22 anyos, at Ricky Torion, 19.

Base sa ulat ng Las Piñas City Police, bandang 2:35 am nang mahuli ang mga suspek ilang oras pagkatapos looban at tangayan ng P108,520 cash ang RUIPJEY E-BIKES na matatagpuan sa Ramos 4, sa Alabang-Zapote Road, Brgy. Talon Uno, Las  Piñas City.

Ang dalawang suspek ay nahuli dahil sa sumbong ng isang saksi na nakakita umano sa pagnanakaw kaya agad nahuli ang dalawa.

Narekober ng pulisya ang nabanggit na halaga ng pera, kutsilyo, screw driver, isang flat screw at claw bar tool.

Inihahanda na ang kasong isasampa laban sa mga inaresto. (GINA GARCIA)