Mister arestado sa baril at P.3-M shabu sa Kankaloo

SWAK sa kulungan  ang isang hinihinalang tulak ng ilegal na droga matapos makuhaan ng baril at mahigit P.3 milyong halaga ng shabu makaraang magwala sa Caloocan City, kamakalawa ng umaga.

Kinilala ni Caloocan City police chief Col. Samuel Mina, Jr., ang naarestong suspek na si Bengie Ortiquisa, 39 anyos, residente sa Phase 1, Package 3, Blk 60, Lot Excess, Brgy., 176, Bagong Silang.

Ayon kay Col. Mina, isang concerned citizen ang nagtungo sa opisina ng Caloocan Police Sub-Station 12 at inireport ang tungkol sa isang lalaki na nagwawala habang may bitbit umanong baril sa nasabing lugar.

Kaagad nagresponde sa nasabing lugar dakong  6:30 am ang mga tauhan ng SS-12 sa pangunguna ni P/Lt. Ronald Allan Soriano, kasama ang intel operatives sa pangunguna ni P/Major John David Chua, nakakitang nagwawala ang suspek.

Gayonman, nang mapansin ng suspek ang mga pulis ay agad naglabas ng baril saka tumakbo ngunit  hinabol siya ng mga arresting officer hanggang makorner at maaresto.

Nang kapkapan, narekober sa suspek ang isang kalibre .38 revolver, kargado ng dalawang bala, cellphone pouch, at isang knot tied transparent plastic sachet na naglalaman ng nasa 50 gramo ng hihinalang shabu, may standard drug price P340,000.

Nahaharap ang suspek sa kasong paglabag sa Art 151 and 155 of RPC, RA 10591 at RA 9165 o ang Comprehensive Dangerous Drug Act of 2002. (ROMMEL SALES)