HATAW! D'yaryo ng Bayan hatawtabloid.com
NADAKIP ng mga awtoridad ang pang-anim sa most wanted persons ng Calabarzon PNP sa ikinasang manhunt operation sa bayan ng Calauan, lalawigan ng Laguna, nitong Lunes, 16 Mayo.
Iniulat ni Laguna PPO Director P/Col. Cecilio Ison, Jr., kay PRO-CALABARZON Regional Director P/BGen. Antonio Yarra ang pagkakaaresto sa suspek na kinilalang si Rogelio Brion, 66 anyos, magsasaka, at residente sa Brgy. Lamot 1, sa nabanggit na bayan.
Sa ulat ni P/Lt. Col. Philip Aguilar, hepe ng Calauan MPS, nasakote ang akusado dakong 6:32 pm kahapon sa naturang lugar sa bisa ng warrant of arrest, sa kasong Robbery with Homicide, may inirekomendang piyansang P200,000, inisyu ng San Pablo City RTC Branch 30.
Matagumpay na naisagawa ang operasyon sa pamamagitan ng nakalap na impormasyon mula sa Barangay Intelligence Network (BIN) ng komunidad
Kasalukuyang nasa kustodiya ng Calauan MPS ang naarestong suspek habang ipinadala na ang abiso sa court of origin.
Pahayag ni P/BGen. Yarra, “Kapuri-puri ang Calauan MPS sa kanilang accomplishment lalo sa kampanya nito laban sa mga wanted person. Patuloy na tututukan ang mga wanted na kriminal kahit magtago sila sa malalayong lugar.” (BOY PALATINO)
