Proyektong mag-aangat sa Navoteños sinimulan

INIHAYAG ni Navotas City Mayor Toby Tiangco, sinimulan nang tambakan at i-develop ng San Miguel Corporation ang mga palaisdaan sa Tanza, may kabuuang 343 hectares airport support services.

Ayon kay Mayor Tiangco, isa itong proyekto na magbubukas ng napakaraming oportunidad sa trabaho at hanapbuhay na lalong magpapaangat sa buhay ng bawat Navoteño.

Aniya, dito itatayo ang iba’t ibang airport support industries para sa New Manila International Airport tulad ng aviation maintenance, airport catering, fast cycle logistics, tourism at iba pa.

Magmula Tanza, ang integrated tool expressway ay dederetso sa New Manila International Airport sa Bulakan, Bulacan. Ang Navotas ay mapupunta sa pagitan ng New Manila International Airport at ng ibang lugar sa Metro Manila.

Maghahatid aniya ang proyektong ito ng mas marami pang oportunidad, hanapbuhay, at trabaho para sa mga Navoteño.

Sa bisa ng ordinance No. 2021-40 na inaprobahan ni Mayor Tiangco noong 21 Hulyo 2021, 70% ng mga empleyado ay dapat mga Navoteño.

“Ang NavotaAs institute ay magbubukas ng mga kursong maihahanda ang ating mga kababayan para sa mga skills na kinakailangan.

Makaaasa po kayo na hindi tayo hihinto sa pagsusumikap na ipagpatuloy ang pag-unlad ng Navotas at pag-angat ng buhay ng bawat Navoteño,” ani Mayor Toby.

“Ang plano ng Manila International Airport ay mula sa world renowned urban planner Arch. Jun Palafox na isa sa nag-develop ng napaka-progresibong siyudad na Dubai at lumikha ng libo-libong trabaho sa mahigit 40 bansa,” pahayag ni Cong. John Rey Tiangco. (ROMMEL SALES)