HATAW! D'yaryo ng Bayan hatawtabloid.com
BINAWIAN ng buhay ang isang truck driver nang pagbabarilin ng mga hindi kilalang suspek sa bayan ng Atok, lalawigan ng Benguet, nitong Martes ng umaga, 8 Pebrero.
Kinilala ang biktimang si Crisanto Kiblasen, 27 anyos, residente sa Brgy. Sadsadan, bayan ng Bauko, Mountain Province.
Ayon sa pulisya, bumibiyahe sina Kiblasen at kaniyang dalawang kasama sa national road sa kahabaan ng Km. 8 sa Brgy. Caliking nang harangin sila ng isang Toyota Innova at puwersahang pinatigil.
Bumaba ang tatlong armadong lalaki mula sa sasakyan saka inutusan ang mga pasahero ng truck na umalis saka binaril si Kiblasen.
Patuloy ang imbestigasyon ng mga awtoridad upang matukoy ang motibo sa likod ng pananambang at ang pagkakakilanlan ng mga suspek.
