Las Piñas City LGU pasado sa SGFH ng DILG

INIANUNSIYO nitong Huwebes, 20 Enero 2022, ni Las Piñas City Mayor Imelda Aguilar ang pagpasa ng lungsod sa 2021 Seal of Good Financial Housekeeping (SGFH) ng Department of the Interior and Local Government (DILG).

Sinabi ni Mayor Aguilar, kinilala ng DILG ang mga naging hakbang ng Las Piñas LGU sa pagpapanatili ng magagandang gawain sa fiscal accountability at transparency sa lokal na pamahalaan.

Base sa rekomendasyon ng DILG – Bureau of Local Government Supervision (DILG-BLGS), ang Las Piñas City ay kabilang sa tatlong lungsod na kinilala bilang DILG 2021 Good Financial Housekeeping Passers. Ang dalawang siyudad na kasama ng Las Piñas ay ang Makati at Muntinlupa.

Inihayag ng alkalde, ang naturang pagkilala ay sertipikado at aprobado ng ahensiya sa National Capital Region (NCR) na may petsang 5 Nobyembre 2021.

Ayon kay Maria Lourdes Agustin, DILG Regional Director, ang criteria ay ibinatay sa katatapos na available COA Audit Opinion at compliance with full disclosure policy.

Lubos na nagpapasalamat si Mayor Aguilar sa ibinigay na pagkilala sa Las Piñas city government at nangakong ang kanyang administrasyon ay patuloy sa magbibigay ng magandang pamamahala at mas maayos na mga serbisyo para sa mga Las Piñeros. (GINA GARCIA)