Sylvia sa lock-in: Mabilis natatapos pero nakaka-miss ang pamilya

SOBRANG na-miss ni Slyvia Sanchez ang kanyang asawa’t (Papa Art Atayde) mga anak (Arjo, Ria, Gela, at Xavi ) dahil ilang linggo siyang nasa Bicol para sa lock-in taping ng hit seryeng Huwag Kang Mangamba.

Kuwento ni Sylvia nang makausap namin sa cellphone kamakailan, ”Ang mahirap lang sa lock-in taping eh ‘yung mami-miss mo talaga ‘yung pamilya mo kasi malalayo ka sa kanila.”

Dagdag pa ng tinaguriang Face of Beautederm, “Katulad namin ilang linggo na kaming nandito sa Bicol para sa taping ng ‘Huwag Kang Mangamba,’ kaya mami-miss mo talaga ‘yung family mo.

“Ako pa naman hindi ako sana’y na nalalayo sa asawa ko at sa mga anak ko, kaya nakakapanibago talaga.

“Pero ‘yun na talaga ang proseso ng taping ngayon kaya kailangang sumunod para magtuloy-tuloy lang taping at para may trabaho ang lahat.

“Pero ang maganda lang sa lock-in taping, mas madaling matapos ‘yung trabaho and para na rin naman sa proteksiyon ng bawat isa dahil na rin sa pandemiya.”

Nai-share rin ni Sylvia ang sobra-sobra niyang kasiyahan sa nominasyong nakuha sa Star Awards for Movies para sa pelikulang Jesusa (Best Actress) at sa Star Awards for Television para naman sa teleseryeng  Pamilya Ko (Best Drama Actress).

“Nakatutuwa lang kasi dalawa ‘yung nominasyong nakuha ko.

“Para sa akin manalo o matalo okey lang sa akin ‘yun kasi mapansin ‘yung trabaho ko at ma-nominate ako, malaking bagay na sa akin ‘yun,” sambit pa ni Sylvia.

(JOHN FONTANILLA)