Kabutihan at mapagmahal sa pamilya ni Andrea pinuri

Rated R
ni Rommel Gonzales

NAPURI si Andrea Torres ng headwriter ng Legal Wives na si Suzette Doctolero.

Sa kanyang Facebook post kamakailan, sinabi ni Suzette na fan na siya ngayon ni Andrea, lalo pa at personal niyang nakita ang mahusay na work ethic nito at ang pagiging propesyonal.

“Napanood ko na ng dalawang beses ang episode ng ‘Legal Wives’ kagabi. Ang pagkikita ng dalawang misis. Naging fan ako bigla ni Andrea Torres dahil sa ‘LW.’

“Ang sarap panoorin ng nuances na ibinibigay niya sa role. Hindi lang siya magaling na artista, napakabuting babae pa.

“Sa loob ng apat na lock in taping (na kasama ako, isa ang hindi) ay naobserbahan ko siya: always smiling at palabati sa lahat (may katungkulan man o wala), kapag rest day ay nagbabasa ng libro, pili ang salita pero may laman, dumarating rin sa set na kabisado na ang linya.

“Nakakuwentuhan ko rin nang ilang beses kaya alam ko kung gaano niya kamahal ang pamilya niya. Masunurin din sa magulang, generous na ate. Pinalaking may strong sense of values. May sense kausap at malalim.”

Dagdag pang post ni Suzette. ”Yes, hindi lang siya katawan. May puso, talino at husay ang babae!”

Gumaganap si Andrea sa Legal Wives bilang si Diane na isa sa tatlong asawa ni Ismael (Dennis Trillo). Ang dalawa pang legal wives ay sina Alice Dixson at Bianca Umali.