HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
HINDI naman itinatago kapwa nina Kim Molina at Jerald Napoles na nagsasama na sila sa iisang bahay. Pero iginiit na wala pa silang planong magpakasal lalo’t lalong gumaganda ang kani-kanilang career.
Sa virtual media conference para sa kanilang pelikulang Ikaw at Ako at Ang Ending ng Viva Films na mapapanood na simula August 13 sa ktx.ph, iWant TFC, TFC IPTV, at Vivamax, sinabi nilang wala pa sa kanilang plano ang pagpapakasal.
“Marami pang aasikasuhin ngayon lalo na ECQ na naman,” ani Jerald.
“Pero nag-uusap naman po kami about our future. Alam po namin kung saan papunta. Especially si Je, alam niyo naman, gentleman ‘yan, gusto niya at ease ako kasi alam naman po niya na 30 (years old) na po ako. May mga ganoong pag-uusap naman,” pag-amin ni Kim.
Sinabi pa ng dalawa na madaling pagplanuhan ang kasal. ”Pero mahirap panindigan,” giit ni Je.
“Kaming dalawa ni Jerald we respect each other’s individuality. Although Si Jerald siyempre nirerespeto niya ‘yung idea na ako at ang parents ko, na siyempre gusto ng parents ko na magpakasal na kami. Kumbaga sa career namin, ngayon pa lang kami nandito,” paliwanag ni Kim na sunod-sunod nga naman ang paggawa nila ng pelikula.
Sabi nga kahit pandemic, bongga pa rin ang kanilang mga career at taon nila ang 2021. Mula sa kanilang unang successful na team-up sa Ang Babaeng Walang Pakiramdam, nasundan agad ito ng romantic movie na idinirehe ni Irene Emma Villamor, itong Ikaw at Ako at Ang Ending.
“From ‘Rock of Aegis,’ everything happened so quickly, so ayoko rin pong i-hold back y’ung gustong gawin ni Jerald for himself. Kumbaga bago po kami magsama bilang isa, kailangan buo kami individually,” sambit pa ni Kim.
Samantala, ang Ikaw at Ako at Ang Ending ang pinaka-daring movie ng dalawa. Sa trailer pa nga lang, makikita na ang maiinit nilang love scenes. Mabuti na lang ang magdyowa nga sila in real life kaya mas madali na gawin ang mga eksena.
Natanong ang dalawa kung hanggang saan ang kanilang limitasyon sa daring scenes at kung kaya nila ang frontal nudity?
At ”no” pareho ang sagot nila.
“Actually, hindi ko masasagot, pero sa ngayon, hindi,” ani Jerald.
Sabi naman ni Kim, ayaw na niyang bigyan ng alalahanin ang kanyang mga magulang.
“Sa nangyayari po sa mundo, ang magulang ko po ay malayo, ayoko na pong dagdagan ang maiisip ng tatay ko, hindi ko na lang po gagawin,” giit ng komedyante.
Hindi nga pinanood ng tatay ni Kim ang trailer ng Ikaw at Ako ang Ang Ending.
“Ayaw ko pong bigyan ng sakit ng ulo ang tatay ko, so hindi pa po natin kailangang…” ani Kim.
Iginiit pa ni Kim na hindi niya kailangang talagang maghubad nang todo sa pelikula kahit pa tapatan ito ng P5-M.
Mapapanood ang Ikaw at Ako at Ang Ending globally sa mga streaming platforms na ktx.ph, iWant TFC, TFC IPTV at sa VIVAMAX sa Aug. 13.
