Delivery rider timbog sa droga

TIMBOG ang 40-anyos delivery rider nang mabuko na may dalang malaking halaga ng ilegal na droga, sa ikinasang “Oplan Sita” ng mga opearatiba ng Las Piñas police, kamakalawa ng gabi.

Kinilala ni Southern Police District, director P/Brig. General Eliseo Cruz, ang suspek na si Mark Gil Terrobias, delivery rider ng kilalang delivery service company sa Gatchalian Subdivision, Barangay Manuyo Dos, Las Piñas City.

Dakong 9:00 pm nang pahintuin ng grupo ni P/Col. Rodel Pastor, nagsasagawa ng Oplàn Sita, ang motorsiklo ni Terrobias sa Plaza Quezon, sa Real St., Brgy. Elias Aldana, sa lungsod.

Nang rekisahin, natagpuan sa pag-iingat ng rider ang dalawang plastic sachet ng hinihinalang shabu na tinatayang 10.7 gramo, nagkakahalaga ng P72,760.

Nahaharap sa kasong paglabag sa Section 11 ng Republic Act 9165 o possession of illegal drugs ang suspek na nasa kustodiya ng pulisya.

(JAJA GARCIA)