HATAW! D'yaryo ng Bayan hatawtabloid.com
IPINAG-UTOS ng isang opisyal ng lungsod ng Cebu ang pagtatanggal ng mga tarpaulin na ikinabit sa ilang mga kalye at kalsada sa siyudad na nag-uudyok kay Davao City Mayor Sara Duterte na tumakbo bilang pangulo.
Ayon kay Florante Catalan, hepe ng Cebu City Office of the Building, walang natanggap ang kanilang opisina na anomang aplikasyong nagpapaalam na magkabit ng streamer o tarpulin mula sa “Friends of Sara” o “Run Sara Run.”
Ang Office of the Building ang namamahala at nagtitiyak na masusunod ang National Building Code.
Sa paglalagay ng mga poster, streamer, at tarpulin, kinakailangan magpaalam muna sa naturang tanggapan na nakasailalim sa ordinansa ng lungsod.
Dagdag ni Catalan, uutusan niya ang tanggapan ng Prevention Restoration Order Beautification Enhancement na tanggalin ang mga ilegal na tarpaulin na nakasabit sa elevated walkways na hindi bababa sa apat na magkakaibang lokasyon sa lungsod.
