HATAW! D'yaryo ng Bayan hatawtabloid.com
SOBRA ang kagalakan ng actor/direktor/producer na si Ruben Maria Soriquez nang sumungkit ng apat na parangal ang pelikula nilang The Spiders’ Man sa Accolade Global Film Competition 2020.
Ang pelikula ay tinatampukan nina Richard Quan, Direk Ruben na siya ring namahala ng pelikula, Lee O’Brian, Rob Sy, Jeffrey Tam, Lanie Gumarang, at iba pa.
“Ang saya-saya ko, sobrang saya ko,” sambit niya nang makapanayam namin thru FB.
Ang apat na karangalang nakuha nila sa naturang award giving body ay ang: Award of Merit Special Mention Lead Actor – Richard Quan, Award of Merit for Directing – Ruben Maria Soriquez, Award of Merit Supporting Actor – Ruben Maria Soriquez, at Award of Merit Feature Film – Directed by Ruben Maria Soriquez.
Kaya masasabing big winner dito si Direk Ruben dahil kinilala siya bilang director at supporting actor para sa kanilang pelikula.
Paano niya ide-describe ang movie nilang The Spiders’ Man?
Tugon ni Direk Ruben, “Ito ay isang pangunahing autobiographical film na inspirasyon ng mga totoong kaganapan. Sa pelikula ay may isang hero, ang aking mentally challenged half brother played by Richard Quan. Ito ay isang comedy thriller na tungkol sa kapatiran at sakripisyo.”
Inusisa rin namin ang role niya sa movie? “Ang role ko ay isang matagumpay na Fil-Italian businessman ngunit mayroon siyang mga isyu sa pamilya. Si Mike (Richard) ay tutulong sa kanya na pagalingin ang kanyang mga sugat. Ang pelikula ay inspirasyon din ng Dustin Hoffman-Tom Cruise movie na Rain Man. It’s distributed worldwide by Leomark Studios US.
“Sana sa end ng taon na ito, it will be streamed in Asia,” pakli pa ni Direk Ruben.
ALAM MO NA!
ni Nonie Nicasio
