HATAW! D'yaryo ng Bayan hatawtabloid.com
ISA tayo sa mga bumibilib sa tambalang Mayor Francisco “Isko Moreno” Domagoso at Vice Mayor Honey Lacuna-Pangan sa pamumuno sa lungsod ng Maynila.
Mantakin n’yo naman, sa anim na buwang pamumuno nina Mayor Isko at VM Honey ang laki na ng pagbabago ng lungsod.
Siyempre, hindi naman puwedeng salita nang salita ang isang Mayor tapos wala naman palang pangil ang mga sinasabi niya.
Sino ang maglalagay ng pangil sa mga utos o pahayag ng Alkalde? Siyempre ang Konseho ng Maynila na pinamumunuan naman ni VM Honey.
Ang bawat utos ni Mayor Isko ay kinakailangan tapatan ng ordinansa o resolusyon ng Konseho.
At diyan nagtutulungan nang husto sina Mayor Isko at VM Honey.
Hindi nagiging ‘white element’ ang mga proyekto ng alkalde kasi nga may katumbas itong ordinansa o resolusyon.
Ano pa ang isang pagtutulungan ng dalawang opisyal ng Maynila?
Nitong linggo, nang italaga ni Yorme si Madam Honey na maging acting mayor, aba, hindi nagpatawing-tawing si VM at pinanindigan din niya ang ginagawang pag-iikot ni Yorme upang matiyak ang kaayusan at kapayapaan sa lungsod ganoon din ang kalinisan.
Ako man ay nagkamali ng akala. Inakala ko kasi noong mga nakaraang administrasyon, ‘flower vase’ lang si VM Honey, hindi pala.
Isang maling akala pala!
Kapag pinagkalooban pala ng ganap na awtonomiya at basbas ay ginagawang mabuti ni VM Lacuna ang iniatang o pansamantalang ipinagkatiwalang tungkulin sa kanya.
Ayon kay Mayor Isko, malaking tulong ang pagiging timon ni VM Lacuna sa Konseho ng Maynila, gayondin ang pakikipagtulungan nina majority leader Joel Chua at 3rd district councilor Letlet Zarcal, na nagbigay daan kaya’t naipasa ang 30 ordinansa at 167 resolusyon na ang layunin ay para sa kapakanan ng Manileño at mapabuti ang kalagayan ng Maynila.
Malaking tulong ang konseho sa implementasyon ng hangarin ni Mayor Isko na maiangat ang antas ng pamumuhay ng mga maralita sa lungsod sa pamamagitan ng social amelioration programs ng lungsod.
Ayon naman kay VM Lacuna, mananatili ang kanyang suporta kay Mayor Isko dahil mabuting intensiyon ang kapwa nila hangad sa lungsod at sa mga Manileño.
‘Yan ang tunay na tandem!
Saludo po kami sa inyo Yorme Isko at VM Honey.
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
