Karpintero ‘naglagari’ ng dakma sa kaselanan ng dalagang pharmacist (May blackeye na, himas-rehas pa)

KULONG matapos ma­ka­tikim nang matinding sapak sa isang dalagang pharmacist ang isang karpinterong manyakis na dalawang beses dinakma ang kaselanan ng babaeng kasakay sa pampa­sahe­rong bus habang buma­baybay sa Valenzuela City, kamakalawa ng gabi.

Kinilala ang suspek na si Lodgerio Navarte, 53 anyos, taga-Kabesang Porong St., Punturin, sa nasabing lungsod na sinampahan ng pulisya ng kasong Acts of Lasci­viousness sa piskalya ng Valenzuela City.

Sa pahayag sa pulisya ng 31-anyos dalagang pharmacist ng isang kilalang botika, dakong 9:05 pm, katabi niya sa upuan sa sinasakyang pampasaherong bus ang suspek pero pagsapit sa Valenzuela Gateway Complex Terminal sa Paso de Blas, naram­daman niyang dumapo sa maselang parte ng kanyang katawan ang kamay ng lalaki.

Natakot at nabalisa ang biktima ngunit mu­ling dinakma ni Na­var­te ang maselang parte ng kata­wan kaya’t sa pag­kakataong iyon, biglang inundayan ng isang malakas na suntok ang suspek na ikinabigla ng iba pang pasahero ng bus.

Nagkataon na nagpa­patrolya sa naturang lugar ang mga tauhan ng Valenzuela Police Com­munity Precinct (PCP) 1 sakay ng kanilang mobile patrol kaya’t nakahingi kaagad ng tulong ang biktima na nagresulta sa pagkakaaresto sa suspek.

(ROMMEL SALES)