SEOUL – TINIYAK ng administrasyong Duterte sa gobyernong South Korea, hindi mapupunta sa korupsiyon ang inilaan nitong US$1-B Official Development Assistance para ipantustos sa Build, Build, Build projects.
Sa press briefing sa Imperial Palace Hotel kahapon, sinabi ni Finance Secretary Carlos Dominguez, hindi maaaksaya sa korupsiyon ang pera ng mga mamamayan ng South Korea.
Tungkulin aniya ng pamahalaang Duterte na maging ligtas sa katiwalian ang ipinautang na pera ng South Korea sa Filipinas at tututukan ang lahat ng proyektong tutustusan nito.
“It is our duty to make sure that those funds are safe from corruption. We are monitoring these projects carefully,” ani Dominguez.
Giit ni Dominguez, nakalahok ang Commission on Audit (COA) sa pagtutuos sa lahat nang ginagasta sa nasabing mga proyekto.
Maging si Pangulong Duterte aniya’y hindi mangingiming sibakin ang mga opisyal na hinihinalang sangkot sa korupsiyon.
Sa ganitong paraan, ani Dominguez, ang mga empleyado at opisyal ng gobyerno pati ang pribadong sektor ay mag-iingat sa paggasta sa pera ng bayan pati ang pondo mula sa taxpayers ng ibang bansa.
”We have COA involved in the audit of these projects. And the President has taken upon himself to fire people who are suspected of corruption. In this sense, the government employees as well as the private sector will be careful in the use of government funds and funds of taxpayers of other countries,” giit ni Dominguez.
Iniulat ni Dominguez, mula sa $500-M ay ginawang $1-B ng SoKor ang ODA para sa Filipinas mula 2017 hanggang 2022.
Kabilang sa paglalaanan ng pondo ay US$172.64-M Cebu international container port project, US$50-m project facility ng National Irrigation Administration (NIA ), US$100-M Dumaguete airport, US$41-M electronic receipt and invoices, at US$636-M para sa dalawa sa tatlong projects pa sa BBB.
(ROSE NOVENARIO)