Investment scam group leader tiklo sa Albay

NADAKIP ang isang lalaki na sinabing lider ng isang investment scam group sa Albay, nitong Martes ng hapon.

Arestado sa bisa ng warrant of arrest si Joel Agnabo, 52, hinihinalang lider ng Agnabo investment scam sa Camarines Sur.

Ayon sa report ng PNP Criminal Investigation and Detection Group, iniwan ni Agnabo ang kaniyang pamilya sa Naga City at nagpalipat-lipat ng bahay simula nang sunod-sunod na lumabas ang reklamo laban sa kaniya ng mga investor.

Ngunit paglabas ng warrant of arrest noong Nobyembre 2017, sa bayan ng Polangui, Albay na namalagi si Agnabo.

Kasama sa warrant of arrest ang asawa ni Agnabo na si Maria Cynthia, na nahaharap din sa kasong estafa, patuloy na pinaghahanap ng mga awtoridad ngayon.

Maaaring magpiyansa ng P40,000 si Agnabo sa kaso.

Bukod sa warrant of arrest para sa kasong estafa, patong-patong na kaso ng syndicated estafa ang isinampa sa kaniya at sa kaniyang pamilya ng iba pang investors.

Nasa kustodiya si Agnabo ng Naga City District Jail.