Misis tinaga ni mister (Nahuli kasama ng kalaguyo)

ARESTADO ang 41-anyos lalaki makaraan tagain ang kanyang misis nang mahuli habang kasama ang umano’y kalagu­yo ng ginang sa Currimao, Ilocos Norte, nitong Sabado.

Ang biktimang si Princess Rafanan, 31, ay nagkaroon ng sugat sa kamay makaraan tagain ng mister niyang si Frederick Rafanan.

Sa imbestigasyon, nahuli ni Frederick na kasama ng kaniyang misis ang umano’y kalagu­yo na si Helmer Melendez.

“Nakasakay sa tricycle si Princess na minaneho ni Helmer at sinundan sila ni Frederick na naka-van. Nang makababa sila may armas nang itak si Frederick at tinangka niyang tagain si Helmer pero nakatakbo,” ayon kay Senior Inspector Marlon Padamada, hepe, PNP-Currimao, Ilocos Norte.

Tinaga rin niya ang kaniyang misis ngunit naharangan niya ito at nasugat ang kaniyang kamay.

“Isang buwan nang hindi nagsasama ang mag-asawa dahil sa umano’y pananakit ng suspek sa kaniyang misis,” dagdag ni Padamada.

Sa manhunt operation, nahuli ang suspek sa Sinait, Ilocos Sur.

Depensa ng suspek, nagdilim ang kaniyang paningin nang makita niya ang dalawa.

“Napatunayan ko na mayroon talagang ginagawang masama,” ani Frederick.

Sasampahan ng kasong frustrated parricide at attempted murder si Frederick.