EX-SAF namaril ng bagets, dalagita tinamaan

ARESTADO ang isang dating miyembro ng Special Action Force (SAF) makaraan akusahan ng pamamaril sa grupo ng mga menor-de-edad na ikinasugat ng isang 14-anyos dalagita sa Malabon City, kamakalawa ng gabi.

Lasing pa ang suspek na kinilalang si David Bolor, Jr., 34-anyos, taga-147 Gov. Pascual St., Brgy. Sipac, Navotas City, nang arestohin ng mga operatiba ng Malabon Police Community Precinct (PCP) 3, sa Pampano St., Brgy. Longos, dakong 11:50 at nakompiskahan ng kalibre .9mm pistol.

Sa imbestigasyon nina PO2 Romeo Germinal at SPO1 Romirosa Mallari, sakay ang suspek sa kanyang motorsiklo nang huminto sa harap ng grupo ng mga menor-de-edad sa Block 48, Brgy. Longos.

Bumaba ang suspek at nagtanong sa grupo ng mga kabataan kung sino ang nagsa-shabu sa nasabing lugar. Ngunit nang walang sumagot ay bumunot ng baril ang lasing na si Bolor.

Dahil sa takot, nagpulasan ang mga kabataan ngunit pinutukan sila ng suspek at tinamaan sa kaliwang baywang ang Grade 6 pupil na si April Marie Pepito, ng Block 9, Pama Sawata, Dagat-Dagatan, Caloocan City.

Isinugod ang biktima sa Tondo Medical Center habang narekober sa pinangyarihan ng insidente ang dalawang basyo ng kalibre .9mm pistol.

(ROMMEL SALES)