SAN LUIS, Pampanga – Patay ang isang hinihinalang drug pusher makaraan makipagbarilan sa mga operatiba ng San Luis Police Anti-Drugs Special Operation Task Group sa buy-bust operation sa bayan ng San Luis.
Nabatid sa ulat ni Chief Insp. Jose Charlmar Gundaya, hepe ng San Luis Police, sa tanggapan ni Senior Supt. Joel R. Consulta, acting Pampanga Provincial Police director, hindi umabot nang buhay sa San Luis Disrict Hospital ang suspek na si Clemente Talantor, alyas Bakla, 45, residente sa Solivan, Baliuag, Bulacan.
Samantala, arestado sa nasabing operasyon ang iba pang hinihinalang tulak ng ilegal na droga na sina Ramil Medina, 47; Mike Marcel Fulgar, alyas Mickey, 24; at Randy Garcia, 38, pawang ng nasabing lugar.
Ayon kay Gundaya, nakatangap sila ng impormasyon hinggil sa pagtutulak ng droga ng mga suspek na kumukuha ng supply sa Baliuag.
Agad nagkasa ng buy-bust operation ang mga awtoridad ngunit lumaban si Talantor sa mga pulis na nagresulta sa kanyang pagkamatay, habang inaresto ang tatlo pang mga suspek. (L. AREVALO)
