3-anyos paslit nabagsakan ng hollow blocks patay

PATAY ang isang 3-anyos lalaking paslit, makaraan mabagsakan nang nakasalansan na hollow blocks sa isang inire-renovate na bahay habang naglalaro sa Old Sta. Mesa, Maynila, kamaka-lawa ng hapon.

Binawian ng buhay habang isinusugod sa San Juan Medical Center Hospital, ang biktimang si John Brandon Garcia, ng 4886 Int. 22, San Roque St., Old Sta. Mesa, Maynila, bunsod nang pagkabasag ng bungo at may matigas na bagay na tumusok sa kanyang kanang pisngi.

Ayon sa imbestigasyon ni PO3 Aldeen Legaspi, ng Manila Police District-Homicide Section, naganap ang insidente dakong 1:20 pm sa 4886 Int. 22, San Roque St., Old Sta. Mesa.

Naglalaro ang bata sa kinukumpuning bahay na pag-aari ni Ronhel Claud, 31, nang mabagsakan ng hollow blocks, na isinalansan ni Fracisco Barcial, Jr., 42, construction worker.

Patuloy ang imbestigasyon ng pulisya para mabatid kung may pananagutan sina Claud at Barcial sa pagkamatay ng biktima.

(LEONARD BASILIO)