HATAW! D'yaryo ng Bayan hatawtabloid.com
PATAY ang tatlong hinihinalang mga miyembro ng Brondial robbery holdup group, makaraan makipagbarilan sa mga awtoridad, sa follow-up operation sa serye ng pagholdap sa lungsod ng Makati, kahapon ng madaling araw.
Wala nang buhay nang idating sa Ospital ng Makati ang mga suspek na sina Jason Brondial, lider ng grupo; Noel Fajardo, at Donald Bacsal, pawang ng Pasay City.
Base sa ulat kay Southern Police District (SPD) director, Chief Supt. Tomas Apolinaro, Jr., naganap ang enkuwentro sa panulukan ng Chino Roces Avenue at Metropolitan Avenue, Brgy. San Antonio Village, Makati City, dakong 12:45 am.
Nauna rito, nakatanggap ng impormasyon ang Makati City Police, kaugnay sa tatlong lalaking lulan ng motorsiklo, na responsable sa holdap ng mga pasahero sa bus stop sa Buendia-EDSA.
Agad naglatag ng operasyon ang mga awtoridad at nang mamataan ang mga suspek ay hinabol at pinasusuko.
Ngunit nakipagpalitan ng putok ang mga suspek sa mga pulis na nagresulta sa kanilang pagkamatay.
(JAJA GARCIA)
