Kiko, ang sepulturero ng Senado

ISA si Sen. Francis “Kiko” Pangilinan sa nagnanais na maalis sa Libingan ng mga Bayani (LNMB) si Pangulong Ferdinand Marcos. Matapos na mailibing ang labi ni Marcos sa LNMB nitong nakaraang Biyernes iginigiit nitong si Kiko na mali ang naging kautusan ng Supreme Court.

Matigas ang bungo nitong si Kiko. Pilit na ikinakatuwirang hindi  bayani si Marcos sa kabila nang hindi naman kasali ang usaping ito sa naging desisyon ng SC. Naturingang abogado, pero lumalabas na pulpol mangatuwiran itong si Kiko.

Saan humuhugot ng galit itong si Kiko sa kabila nang hindi naman siya naging tunay na kasapi ng “kilusan” tulad nina Lean Alejandro at Malou Mangahas.  Oo, naging presidente siya ng UP Student Council, pero alam ng lahat na hindi naman lumutang para direktang lumaban sa diktaduryang Marcos.

Kaya nga, nakahihiya dahil feeling tunay na “leftist” itong si Kiko, samantala ayon mismo sa isang sikat na broadcaster, ‘palaboy’ lang ito sa UP campus. At dahil nga sa awa, kinuha ito ng nasabing broadcaster kaya naman nakapagtrabaho si Kiko sa ABS-CBN.

Pero kung talagang atat na atat itong si Kiko na maalis ang labi ni Marcos sa LNMB, bakit hindi siya kumuha ng pala at hukayin niya ang mga buto ni Apo; dalhin niya sa Ilocos at ibigay sa mga Ilocano.

Sa ganitong paraan tiyak na makokontento na itong si Kiko. Hahangaan siya sa kanyang gagawin at malamang na tawaging… Kiko, ang sepulturero ng Senado.