LTFRB chairman Martin Delgra III mahilig na sa trip, power tripper pa?!

IBANG klase raw talaga ang bagong chairman ng Land Transportation and Franchising Regulatory Board (LTFRB) na si Martin “Chuckbong” Delgra III.

Sa lahat yata ng appointee ni Pangulong Rodrigo “Digong” Duterte, tanging si Delgra ang tila magpapasakit ng kanyang ulo!?

Ayon sa ating impormante, nitong nakarang Undas, sa panahon na  abala ang lahat ng mga opisyal at empleyado na may kaugnayan sa transportasyon gayondin ang pulisya, ang ginawa ni Delgra ay lumipad umano patungong Korea.

Hindi natin alam kung opisyal o personal ‘yang trip na ‘yan.

Pero ang gusto nating maiklaro, hindi ba puwedeng maipagpaliban ang kanyang pagbisita sa Korea, gayong alam naman niyang kasagsagan ng pagbiyahe-biyahe ng mga mamamayan pauwi sa probinsiya at paluwas ng Maynila?

Hindi man lang ba niya naisip na kailangan niyang makiisa sa layunin ng pamahalaan na maging ligtas ang mga mamamayan sa kanilang biyahe at maging maayos ang trapiko, ganoon din ang mga lansangan na kanilang daraanan?!

Akala siguro ni Delgra, komo chairman siya ng LTFRB, puwede na siyang tumakas nang ganoon na lang…

Nabigyan kaya ng travel permit ng Palasyo si Delgra nang pumunta sa Korea?!

Nang dumating daw mula sa Korea, agad dumiretso sa Davao si Delgra.

Hinahabol siguro si Tatay Digong para magpakitang gilas!?

Kung ang hangad ni Pangulong Digong ay mapabilis ang mga transaksiyon sa iba’t ibang tanggapan ng pamahalaan, si Delgra mukhang hindi natin makita ang pagnanasa na makasunod sa utos ng Pangulo.

Sa halip, gumawa pa siya ng isang rekesitos na lalong nagpahirap sa applicants sa LTFRB.

Ang sabi sa ruling, kailangan ang mga dokumento ay verified. Ang ginawa ni Delgra, nagdagdag ng requirement na “verification against forum shopping.”

O di ba?

‘E mukhang kontra ‘yan sa nais ni Pangulong Duterte na pabilisin ang lahat ng transaksiyon sa gobyerno ‘di ba?

Mahilig na sa trips, ang lakas pa mag-power trip.

‘E imbes maging madali lalo pang tumagal ang proseso.

‘Yan ba ang tinatawag na “the change is coming” sa administrasyon ni Digong?!

KOLIN AIRCON PAMPAINIT NG ULO!
LESTER AIRCONDITIONING SERVICE
& MAINTENANCE, MARUNONG BA
TALAGA KAYONG MAG-MAINTAIN?!

Wala pang isang taon nang bilhin ng isang kaibigan natin ang isang inverter airconditioning unit ng Kolin.

Hanggang isang araw, nagulat na lang siya nang biglang namatay ang aircon.

Itinawag naman niya agad sa kanilang customers’ service.

Ang tagal bago nai-schedule ng kanilang customer service ang check-up sa kanyang aircon. Halos isang linggo bago siya napuntahan.

Sa madaling salita, dumating ang Kolin authorized maintenance mula raw sa Lester Airconditioning Service & Maintenance pero ang sagot sa kanya, “Akala po namin cleaning lang.”

So ito, tawag na naman sa customers’ service. Ganoon na naman, hintay na naman ng isang linggo.

Pagdating ng maintenance, umandar naman. Pero dalawang araw lang, namatay na naman.

Wattafak!

Naulit na naman ang paghihintay nang halos isang linggo bago dumating ang air-con technician, saka pa lamang sinabi na mayroong kailangan palitan na spare parts.

Matagal daw ‘yun, baka abutin ng dalawang linggo.

Anak ng teteng!!!

Paano ‘yung walang ibang yunit ng aircon? Magtitiis sa maalinsangan klima sa loob ulit ng dalawang linggo?!

Wala pang isang taon ‘yung under warranty na unit, bakit hindi palitan na lang para hindi napeprehuwisyo ang customer?!

Ganyan ba talaga ang serbisyo ng Kolin?!

Aba, kung bibili kayo ng airconditioning unit ngayon, pag-isipan ninyong mabuti kung Kolin ba ang pipiliin ninyo?!

E baka, sumakit at uminit lang ang ulo ninyo!

Kung Kolin ang bibilhin ninyo, samahan ninyo ng banig-banig na ADVIL.

Wanna try?!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap