HATAW! D'yaryo ng Bayan hatawtabloid.com
MAAARI pa sigurong palagpasin ang tawaging “anak ka ng puta” ni Pangulong Rodrigo “Digong” Duterte si US President Barack Obama. Tawaging “tarantado” si United Nations Secretary General Ban Ki-moon at European Union na “puta kayo!”
Pero ang magkaroon ng isang independent foreign policy ang Filipinas sa ilalim ng administrasyon ni Duterte kasabay ng pagsasabing ititigil na ang war exercises sa mga Kano ay hindi na siguro mapalalagpas ng Estados Unidos.
Sa mga pahayag at aktuwasyon ni Duterte, hindi malayong mapatay siya sa pamamagitan ng asasinasyon o kaya ay magkoon ng kudeta sa Filipinas. Batid ng lahat na ang Central Intelligence Agency (CIA) ang pangunahing armas ng US para magsagawa ng covert at clandestine operations sa mga kumakalaban sa kanilang interes. Ang CIA ay aktibo sa Filipinas.
Nakababahala ang ginagawa ni Duterte lalo nang magtungo siya sa China na isa sa pangunahing “karibal” ng Amerika. At sa kabila ng tensiyon na nagaganap sa pagitan ng Russia at US dahil sa Syria, inihayag din ni Duterte ang plano niyang makipagkita kay Russian President Vladimir Putin.
Hindi pakakawalan ng mga Amerikano ang interes nila sa Filipinas.
Kung tutuusin, tama ang ginagawang pag-alma ni Duterte sa US dahil alam naman ng lahat na hanggang ngayon ay kontrolado pa rin nito ang politika at ekonomiya ng Filipinas. Lamang, gaano ba kahanda ang kasalukuyang administrasyon sa gagawing destabilisasyon ng US mapatalsik lamang sa puwesto si Duterte?
