3 drug pusher tiklo sa buy-bust

ARESTADO ang tatlong hinihinalang mga drug pusher kabilang ang custom representative makaraan magbenta ng shabu sa pulis sa isinagawang drug buy-bust operation sa Caloocan City kahapon ng madaling araw.

Kinilala ni District Anti-Illegal Drugs Special Operation Task Group (DAID-SOTG) Supt. Edgardo Cariaso ang naarestong mga suspek na sina Marcelo Gajudo, Jr., 42; Samuel Estrecho, 49; at Albert Ian Jimenez, Sr., 40, custom representative.

Ayon kay Cariaso, dakong 2:20 am nang ikasa ng kanyang mga tauhan ang buy-bust operation  sa Reparo St., Brgy. 132, Bagong Barrio na nagresulta sa pagkakadakip sa mga suspek.

( ROMMEL SALES )

5 TIKLO SA TOKHANG SA LAS PIÑAS

BUMAGSAK sa kamay ng mga tauhan ng Intelligence Unit ng Las Piñas City Police ang limang lalaki nang maaktohan habang sumisinghot ng ipinagbabawal na droga sa isinagawang “Oplan Tokhang” sa lungsod kamakalawa ng hapon.

Nakapiit sa detention cell ng Station Anti-Illegal Drugs (SAID) ang naarestong mga suspek na sina Arturo Tolentino, 49; Braulio Egaya, 42; Aries Dela Cruz, 24; Jose Mark Tejeresas, 23, at Edu Jaime Jr., 32-anyos.

Base sa ulat ni PO3 Marsito Torreon, imbestigador ng Las Piñas City Police, naaresto ang mga suspek dakong 5:30 pm habang nagpa-pot session sa isang bahay sa Medina Compound, Talon 4.

( JAJA GARCIA )