HATAW! D'yaryo ng Bayan hatawtabloid.com
‘THE Philippine’s biggest star!’ Ganito kung ilarawan ng New York Asian Film Festival sa kanilang official Facebook page ang actor na si John Lloyd Cruz na tumanggap ng Star Asia award dahil sa kanyang magaling na pagganap sa Honor Thy Father ni Erik Matti.
Si Cruz ang kauna-unahang Filipino at Southeast Asian actor na tumanggap ng award mula sa NYAFF na ginanap noong Linggo sa US.
Bukod kay Cruz, binigyang pagkilala rin bilang Star Asia awardees sina Miriam Yeung ng Hong Kong at Lee Byung-hun ng South Korea.
Binigyang pagkilala rin bilang Screen International Rising Star Asia Award si Teri Malvar mula sa kanyang pagganap sa pelikulang Hamog.
Pagkatapos sa NYAFF, muling nagdala ng karangalan sa bansa sa international scene si Malvar nang mapalanunan ang Best Actress award sa Moscow International Film Festival sa Russia. Si Malvar ang kauna-unahang Pinoy na nakatanggap ng award sa nasabing patimpalak.
Ang Hamog ay idinirehe ni Ralston Jover, na kamakailan ay nanalo rin ng Outstanding Artistic Achievement Golden Goblet award sa 2016 Shanghai International Film Festival.
