HATAW News Team
TILA muling ‘nalunesan’ ang Metro Manila nang lumubog sa baha ang mga pangunahing kalsada na isinisi sa hagupit ng Habagat, at sa mainit na kontrobersiya ng ghost flood control projects.
Ang ‘nalunesan’ ay terminong iniluwal ng mga sunod-sunod na insidente sa Senado nitong mga nakaraang buwan na may negatibong epekto sa mamamayan.
Kahapon, Lunes, 17 Agosto, tila muling ‘nalunesan’ ang Metro Manila nang humagupit ang ulang dala ng Habagat dakong 1:00 ng hapon.
Unang angal ng mga motorista, zero visibility kasunod ng pagsisikip ng daloy ng mga sasakyan.
Sa ulat ng Metropolitan Manila Development Authority (MMDA), dakong 2:39 ng hapon, na-monitor ang mga kalsadang hindi na madaanan ng mga sasakyan gaya ng España Boulevard kanto ng M. Dela Fuente St., sa Sampaloc, Maynila na umabot sa 24 pulgada ang lalim ng baha; ang A. Bonifacio Ave., sa Cloverleaf; at ang Araneta Avenue mula Maria Clara St., hanggang Florentino St., sa Quezon City na kapwa umabot sa 26 pulgada ang baha.
Sa Quezon City, hindi rin madaanan ng light vehicles ang ilang bahagi ng NS Amoranto St.; Araneta Avenue kanto ng E. Rodriguez Sr. Ave.; EDSA kanto ng East Avenue; Quezon Avenue malapit sa Capitol Medical Center; at EDSA White Plains northbound dahil sa mataas na baha.
Kabilang din sa lumubog sa Maynila ay ang Rizal Avenue kanto ng Pampanga St.; Abad Santos Avenue kanto ng Yuseco St; España Boulevard kanto ng Antipolo St.; at Dos Castillas St. kanto ng Dapitan St.
Ilang bahagi ng Roxas Boulevard, Quirino Avenue, at Quezon Boulevard ang nanatiling nadaraanan.
Gaya nang dati binaha rin ang ilang lugar sa mga lungsdo ng Malabon, Caloocan, Mandaluyong, Marikina, Makati, Taguig, at Valenzuela.
Kabilang dito ang Gov. Pascual Avenue sa Malabon; C3 Road kanto ng NLEX Connector sa Caloocan; at ilang bahagi ng EDSA service roads.
Iniulat ng MMDA, karamihan sa mga kalsada ay gutter-deep hanggang knee-deep ang baha, pero nananatiling passable ang ilang ruta. Ilang bahagi ng Quezon City, kabilang ang EDSA Aurora Tunnel at EDSA Aguinaldo Gate 3, ang naiulat na humupa ang baha pagsapit ng hapon.
Sa social media, makikita ang mga paskil ng netizens sa kalagayan ng kanilang binahang komunidad.
Maraming netizens ang sinisi ang ulan, ngunit may diin sa mga flood control projects na hindi tinapos o hindi ginawa ng mga contractor.
Sa isang paskil, sinabi ng netizen: “Ang ulan at baha ay tila pagpapaalala para hindi malimutan ng mga mamamayang Filipino na dapat managot ang mga sangkot sa malalang korupsiyon sa flood control projects.”
