Heaven at Marco sweet na sweet muli; Emosyonal ang yakapan

HINDI ang bagong Viva One series na Our Yesterday’s Escape ang naging sentro ng usapan sa mediacon kundi ang muling paglalapit ng dating real-life couple na sina Heaven Peralejo at Marco Gallo. Kitang-kita ng lahat ang pagiging komportable at sweet ng dalawa, bagay na lalong nagpakilig sa kanilang mga tagahanga na matagal nang umaasang muling magiging maayos ang samahan.

Naging usap-usapan noon ang hindi magandang relasyon nina Heaven at Marco matapos ang kanilang hiwalayan. Halos hindi na rin sila nakikitang magkasama sa mga proyekto at events. Ngunit ngayong muli silang nagkatrabaho para sa huling kabanata ng University Series, kapansin-pansin na wala na ang dating ilangan.

Katunayan, inamin pa ng dalawa na nami-miss nila ang isa’t isa noong hindi sila nagkakasama.

Lalong kinilig ang media at fans nang magbiruan sina Heaven at Marco sa entablado. Ramdam ang kanilang natural na chemistry at pagiging magaan sa isa’t isa. Marami tuloy ang nagsabing tila bumalik ang dating closeness ng dalawa, kaya naman muling umasa ang kanilang supporters na baka tuluyan na ring maayos ang lahat sa kanila.

Naging emosyonal naman ang mediacon nang hindi napigilan ni Heaven ang maluha habang inaalala ang naging paglalakbay ng University Series. Ayon sa aktres, hindi nila kailanman inasahan na magiging ganito kalaki ang tagumpay ng franchise na nagsimula lamang sa isang Wattpad adaptation.

“Hindi namin talaga in-expect na aabot kami rito. Noong nagsisimula pa lang kami sa ‘The Rain in España,’ nagma-mall shows kami na kakaunti lang ang nanonood. Pero unti-unti naming nakita kung paano minahal ng mga tao ang series. Hanggang ngayon, sobrang thankful ako dahil sinuportahan nila kami mula umpisa hanggang sa huli,” emosyonal na pahayag ni Heaven.

Habang umiiyak si Heaven sa kanyang pasasalamat sa fans, agad namang lumapit si Marco at mahigpit itong niyakap bilang pagdamay. Ang simpleng yakap na iyon ay sinalubong ng malakas na hiyawan at palakpakan mula sa mga tagahanga na naroon sa event. Marami ang nagsabing isa ito sa pinakamatamis at pinaka-tinatakang eksena ng buong mediacon.

Bukod kina Heaven at Marco, ipinagdiwang din ng buong cast ang matagumpay na pagtatapos ng University Series, na nagsimula sa The Rain in España at nagtapos sa Our Yesterday’s Escape. Para sa cast, hindi lamang ito naging serye kundi isang malaking bahagi ng kanilang buhay at career na nagbigay sa kanila ng napakaraming alaala at pagkakataon.

Sa muling pagkakaibigan nina Heaven at Marco at sa emosyonal na pamamaalam sa University Series, mas lalong napatunayan na may mga sugat na kayang paghilumin ng panahon. 

At para sa kanilang mga tagahanga, ang matamis na yakapan at pag-amin na nami-miss nila ang isa’t isa ay sapat na upang muling magbigay ng pag-asa na ang dating tambalan ay mananatiling espesyal sa puso ng bawat Universikada. (Allan Sancon)