Kapitbahay biglang nagwasiwas ng taga magtiyahin sugatan
SUGATAN ang isang babae at kaniyang pamangkin matapos pagtatagain ng kanilang kapitbahay sa Barangay Malanday, lungsod ng Marikina, nitong Miyerkoles ng gabi, 29 Hulyo.
Ayon sa kanilang kaanak, nasa labas ng kanilang bahay ang mga biktima nang biglang lumapit ang suspek na may dalang itak saka sila indundayan ng taga.
Unang tinaga ng suspek ang ulo ng 10-anyos na batang lalaking biktima saka hinabol ang nakatatandang biktima na inundayan din ng taga nang siya ay madapa.
Nagawang masalag ng biktima ang unang pagtaga ng suspek ngunit nagawa pa rin tamaan ng suspek ang kaniyang ulo saka siya dalawang beses na inuntog.
Samantala, hindi malinaw sa pamilya ng mga biktima ang motibo sa krimen dahil walang alitan sa kanilang pagitan.
Kita sa mga kuha ng cellphone at CCTV ang nagmamadaling pagtakas ng suspek bitbit ang itak na ginamit niya sa krimen.
Nadakip ang suspek sa isingawang follow-up operation ng mga awtoridad kung saan siya nakitang lumalangoy sa Marikina River nitong Huwebes ng gabi, 30 Hulyo.
Kasalukuyan nang nasa kustodiya ng Marikina CPS ang suspek para sa kaukulang dokumentasyon at disposisyon.
