Pamilya pinasok
Ina kinatay sa tabi ng 3 anak
PATAY ang isang 33-anyos ina makaraang pagsasaksakin ng armado ngunit hindi kilalang lalaki na puwersahang pumasok sa kanilang tahanan sa Kabankalan City, Negros Occidental, ayon sa ulat kahapon.
Tinukoy ang biktima sa pangalang Ai-Ai na sinabing pinagsasaksak sa iba’t ibang bahagi ng katawan at idineklarang dead-on-arrival sa pagamutan.
Sa ulat ng Kabankalan City Police, nangyari ang insidente nitong 26 Hulyo sa Barangay Hilamonan, Kabankalan City. Natutulog ang ginang kasama ang tatlong paslit na mga anak nang puwersahang pasukin ng hindi kilalang suspek ang kanilang tahanan.
Tanging ang mag-iina lamang ang tao sa kanilang bahay dahil ang padre de pamilya ay namamasada ng tricycle.
Nagising ang isa sa mga anak ng ginang habang pilit na nanlalaban sa lalaki kaya dito’y mabilis na tumakas ang suspect.
Agad na isinugod ng mister ang kaniyang asawa sa pagamutan nang madatnang duguan pero bigo nang maisalba ang buhay.
Patuloy ang imbestigasyon ng mga awtoridad para matukoy ang suspek at motibo sa krimen.
