Empleyado ng mall ginipit, pinagbantaan
Dayuhang vlogger dinampot sa BGC

ARESTADO ang isang 30-anyos dayuhang vlogger mula sa Ivory Coast dahil sa pangha-harass at pagbabanta sa empleyado ng isang mall sa Bonifacio Global City (BGC), sa lungsod ng Taguig, nitong Lunes, 27 Hulyo.

Kinilala ang suspek na si alyas Jeovani, kasalukuyang naninirahan sa Brgy. Ususan, sa nabanggit na lungsod.

Ayon sa pulisya, naganap ang insidente dakong 11:15 ng umaga, habang nasa labas ng mall ang biktimang 37-anyos area manager.

Napag-alamang kinompronta ng suspek ang biktima, pinagmumura, at inakusahang kinukunan siya ng video nang walang pahintulot, saka siya pinagbantaan.

Dinakip ng security ng mall ang suspek saka ipinasa sa Fort Bonifacio Sub station 1.

Dinala siya kalaunan sa Taguig Pateros District Hospital para sa pagsusuiring medikal bago inilipat sa Station Investigation and Detection Management Section.

Nakatakdang sampahan ang suspek ng kasong unjust vexation sa ilalim ng Article 287 ng Revised Penal Code.