Sa Sta. Maria, Bulacan
BODEGANG IMBAKAN NG EXPIRED NA PRODUKTO SINALAKAY NG NBI

NABISTO ang isang bodega na puno ng mga pagkain at ibang produktong expired na pero ibinebenta nang bagsak presyo sa bayan ng Sta. Maria, lalawigan ng Bulacan.

Napag-alamang ilan sa mga produkto ay para sa mga bata at matatanda na ibinebenta maging sa online na lubhang mapanganib sa kalusugan ng makakakain nito.

Bitbit ang isang search warrant, sinalakay ng mga ahente ng National Bureau of Investigation Counter Intelligence Division (NBI-CID) ang bodega na matatagpuan sa Sitio Ibayong Tabon, Brgy. Parada, sa nabanggit na bayan.

Tumambad sa mga tauhan ng NBI-CID ang mga dairy products, biscuit at vitamins, candies at iba pang sitserya na nakakalat sa sahig na mga nabasa o mga nakakahon na pawang expired na.

Naalarma ang NBI nang matuklasan na marami sa mga expired na produkto ay ibinebenta para sa mga bata at senior citizens.

Sa pag-iimbestiga ay natuklasan na binubura ang expiration date ng mga produkto saka ibinebenta nang mura sa merkado.

Ayon kay NBI Director Melvin Matibag, nakatakdang kasuhan ng paglabag sa FDA Act at Consumers Act ang may-ari ng bodega na kasalukuyang iniimbestigahan. (MICKA BAUTISTA)