DOJ, Senado binulabog ng bomba
BINULABOG ng insidente ng pagsabog ng bomba sa entrance gate ng Department of Justice (DOJ) sa Padre Faura St., sa lungsod ng Maynila, habang natagpuan sa Diokno Boulevard, sa lungsod ng Pasay, malapit sa Senado ang isang improvised explosive device (IED) nitong Lunes, 27 Hulyo.
Sa imbestigasyon, naganap ang pagsabog sa DOJ dakong 12:17 ng madaling araw at walang naiulat na nasugatan o namatay sa insidente.
Agad ipinaalam ang insidente sa Explosive Ordinance Disposal – Manila Police District (EOD-MPD) para sa teknikal na imbestigasyon.
Kabilang sa sinusuri ang mga kuha ng mga CCTV mula sa lugar upang matukoy kung sino ang nag-iwan ng pampasabog.
Samantala, tiniyak ng DOJ na kontrolado ang sitwasyon at nananatiling ligtas ang compound ng kagawaran.
Samantala, dakong 8:13 ng umaga kahapon nang matuklasan ang isang pampasabog sa Diokno Boulevard, sa lungsod ng Pasay, malapit sa Senado.
Ayon sa Pasay CPS, naglalaman ang IED ng 9-volt battery, isang blasting cap, timer, at plastic container na may kulay kayumangging pulbos.
Hindi sumabog ang IED na agad prinoseso at ini-neutralize ng bomb squad.
Iniimbestigahan na ng pulisya ang dalawang insidente.
