Sa Quezon City
‘MARCOS’ TODAS SA TANDEM
DEAD-ON-ARRIVAL sa pagamutan ang isang lalaki matapos pagbabarilin ng mga suspek na magkaangkas sa motorsiklo sa Quezon City, nitong Lunes ng madaling araw, 27 Hulyo.
Dinala sa Quezon City General Hospital ang biktimang kinilalang si Mark Anthony Marcos, 22 anyos, residente sa Brgy. Pasong Tamo, sa lungsod, ngunit idineklarang wala nang buhay.
Samantala, patuloy na nagsasagawa ng follow-up investigation at manhunt operation ang mga tauhan ng Criminal Investigation and Detection Unit-Quezon City Police District (CIDU-QCPD) laban sa mga suspek na tumakas patungong Philand Drive dala ang ginamit na baril sa krimen.
Nabatid na naganap ang insidente dakong 12:40 ng madaling araw sa San Roque, Pingkian I, Brgy. Pasong Tamo, habang kasama ng biktima ang kaibigang nakasaksi sa krimen na kinilalang si alyas Gelo.
Habang nakatayo ang dalawa, sumulpot ang magkaangkas na mga suspek saka pinagbabaril ang biktima.
Narekober mula sa pinangyarihan ng krimen ang limang basyo ng bala ng baril ng SOCO mula sa QCPDFU.
