PFF, PSC inilunsad kauna-unahang AFC Pro Diploma Coaching Course sa bansa
SINA (mula sa kaiwa) PFF President John Anthony Gutierrez, PSC Chairman Patrick Gregorio, lead instructor Stewart Hall at assistant instructor Steve Oonan kasama ang mga kalahok sa kauna-unahang AFC Pro Diploma Coaching Course sa Pilipinas. (PSC photos)
MAYNILA — Isang makasaysayang hakbang sa pagpapaunlad ng football sa bansa ang isinagawa ng Philippine Football Federation (PFF) sa tulong ng Philippine Sports Commission (PSC) matapos ilunsad ang kauna-unahang AFC Pro Diploma Coaching Course sa Pilipinas.
May kabuuang 18 coach ang kabilang sa unang batch ng programa, na binubuo ng 13 Pilipino at limang dayuhan. Nagsimula ang unang module noong Hulyo 22 at magtatapos sa Hulyo 26 sa PSC Media Room sa loob ng Rizal Memorial Sports Complex sa Maynila.
Ang halos isang taong programa ay binubuo ng ilang residential modules at itinuturing na pinakamataas na coaching qualification na iniaalok ng Asian Football Confederation (AFC).
Sa pangunguna ng beteranong football instructor at dating national team head coach na si Stewart Hall, sasailalim ang mga kalahok sa masusing pagsasanay sa pamumuno, tactical analysis, high-performance management, sports science integration at modernong pamamahala ng football clubs.
Dumalaw sa ikatlong araw ng pagbubukas ng programa sina PFF President John Anthony Gutierrez at PSC Chairman Patrick “Pato” Gregorio upang ipakita ang suporta sa makasaysayang proyekto.
Ayon kay Gutierrez, sa mahigit isang siglo mula nang maitatag ang PFF noong 1907, ngayon lamang naisagawa sa bansa ang AFC Pro Diploma Coaching Course.
“Sa loob ng mahigit isang daang taon, hindi pa tayo nagkaroon ng AFC Pro Diploma Coaching Course. Dalawa lamang ang Pilipinong nakakuha ng Pro License at pareho pa silang nag-aral sa ibang bansa. Ngayon, nagbago na iyon,” ani Gutierrez.
Iginiit niya na isa ito sa pinakamahalagang pamumuhunan ng PFF sa coaching education dahil ang pagpapataas ng kalidad ng mga coach ang susi sa pag-unlad ng football sa lahat ng antas.
Pinasalamatan din niya ang PSC sa pagsuporta sa makasaysayang programa bilang bahagi ng layunin nitong gawing mas propesyonal ang coaching sa iba’t ibang sports.
Ang AFC Pro Diploma ay nakalaan lamang sa mga bihasang coach na may hawak na AFC “A” Diploma at aktibong humahawak ng professional o elite football teams. Kabilang sa pagsasanay ang mahigpit na theoretical at practical assessments, club management projects at international exposure.
Samantala, muling tiniyak ni Gregorio ang patuloy na suporta ng PSC sa football, at binigyang-diin na ang mahusay na coach ang pundasyon ng matagumpay na manlalaro at matatag na pambansang koponan.
“Naniniwala akong kayang umangat ng mga Pilipino sa football. Pero kailangan nating mamuhunan, maging seryoso at palakasin ang ating pakikipagtulungan sa FIFA at PFF. Kapag mayroon na tayong mga football field sa buong bansa, kailangan din natin ng mahuhusay na coach, referee at technical officials. Nagsisimula ang lahat sa coach,” ani Gregorio.
Ibinahagi rin niya ang naging karanasan ng PSC sa pagpapalakas ng archery program sa pamamagitan ng world-class coaching at sinabing malaki ang papel ng mahusay na coach sa paghubog ng mga atleta.
Kabilang sa unang batch ang mga coach at technical officials mula sa professional clubs, regional football associations, mga unibersidad at technical department ng PFF.
Ayon kay University of Santo Tomas football director at PFF tutor Marjo Allado, magsisilbing inspirasyon ang programa upang mas maraming Pilipinong coach ang makamit ang pinakamataas na coaching qualification.
Sinabi ni Manila Digger head coach Kim Versales na makatutulong ang programa upang gawing mas moderno ang coaching sa bansa at maipasa ang mga bagong kaalaman hanggang sa grassroots football.
Tinawag naman ni Dynamic Herb Cebu FC head coach Tomasito Glenn Ramos na katuparan ng matagal nang pangarap ng mga lokal na coach ang pagdaraos ng AFC Pro Diploma sa Pilipinas.
Binigyang-diin din nina Central Luzon Football Association Technical Director Mark Anthony Francisco at PFF Mindanao Technical Development Officer Albert Ryan “Abing” Lim na makatutulong ang programa upang makasabay ang mga Pilipinong coach sa pandaigdigang pamantayan at makalikha ng mas maraming de-kalibreng manlalaro para sa pambansang koponan.
Sa pagsisimula ng kauna-unahang AFC Pro Diploma Coaching Course sa bansa, umaasa ang PFF at PSC na higit pang mapalalakas ang kalidad ng coaching sa Pilipinas upang maiangat ang antas ng football sa mga club, regional football associations at pambansang koponan. (PSC/HNT)
