Nadine kontra sa pagbebenta ng carabeef
MATABIL
ni John Fontanilla
NAGBIGAY ng awareness si Nadine Lustre tungkol sa pagbebenta at pagkain ng karne ng kalabaw, o carabeef.
Ini-repost ni Nadine sa kanyang Instagram ang mga information card mula sa Lever Foundation Philippines na kumukuwestiyon sa gawaing ito.
Binigyang diin ng awardwinning actress ang kahalagahan ng kalabaw bilang simbolo ng kasipagan ng mga Filipino at buhay sa probinsiya.
“Matagal nang sumisimbolo ang kalabaw sa kasipagan ng mga Filipino at sa pamumuhay sa probinsiya.
“Nasa ating mga awiting-bayan at makikita sa mga larawan ng mga palayang nagbigay sa atin ng pagkain.
“Ngunit ngayon, isa na itong pagkaing ibinebenta bilang carabeef.”
Ayon naman sa isa pang post, ang hayop na minsang tumulong sa pagsasaka at nag-ambag sa pagpapakain sa bansa ay, “karamihan ay pinahahalagahan na lamang para sa karne at gatas nito.”
Si Nadine na kilalang isang true vegan at sumusuporta sa kapakanan ng mga hayop ay sumusuporta rin sa kampanya laban sa mga nananakit ng mga hayop.
Sa kanyang mga ibinahaging post, hinikayat nito ang publiko na pag-isipang muli ang pagkain ng karne ng kalabaw at pahalagahan ang mahalagang ambag nito sa buhay ng bawat Filipino.
