HATAW! D'yaryo ng Bayan hatawtabloid.com
NAGPAKITANG-GILAS sina Southeast Asian Games campaigner Graziella Sophia Ato at Rio Stephen Coliyat matapos magwagi ng tig-dalawang gintong medalya sa katatapos lamang na Philippine Aquatics, Inc. (PAI) National Open Water Swimming Tryouts na ginanap sa Boracay New Coast sa Malay, Aklan.
Dahil sa kanilang kahanga-hangang kampanya, nakasiguro sila ng puwesto sa pambansang koponan ng Pilipinas na sasabak sa 4th Southeast Asian Open Water Swimming Championships na nakatakda sa Agosto 21-23 sa parehong lugar.
Ang 16-anyos na si Ato mula sa Raois, Vigan, Ilocos Sur ay naghari sa women’s division. Ang Grade 11 student ng Great Heights Learning Center ay nagkampeon sa girls’ 16-17 5-kilometer race at sa under-18 10-kilometer event.
Kinakatawan ang One Ilocos Sur Team sa ilalim ng paggabay ng Olympian na si Ryan Arabejo, nanguna si Ato sa mahirap na 10-kilometrong karera sa oras na 2:24:56, tinalo sina Stacey Arabelle Bee ng Bacolod (2:27:59) at Jeda Lorrine Cruz ng Ilustre East (2:35:27.513).
Nagwagi rin siya sa 5-kilometrong karera matapos magtala ng 1:09:41.835, bahagyang inungusan si Bee (1:09:49.944) at ang tubong Boracay na si Nuche Veronica Ibit (1:12:06.670).
“Masaya at lubos akong nagpapasalamat sa resultang ito dahil nagbunga ang lahat ng sakripisyo at pagsisikap namin sa ensayo,” ani Ato, naging bahagi ng PH Team sa Sea Games sa Bangkok ng nakalipas na taon. “Palaging ipinapaalala ni Coach Ryan na manatiling disiplinado at magtiwala sa proseso. Malaking karangalan na muling makapasok sa national team at excited akong katawanin ang Pilipinas sa Southeast Asian championship dito sa Boracay.”
Samantala, ang kapwa 16-anyos na si Coliyat mula sa Batangas at produkto ng Batang Pinoy program ay kumpletong naghari sa boys’ division sa pamamagitan ng dalawang gintong medalya.
Nasungkit niya ang titulo sa under-18 boys’ 10-kilometer event sa oras na 2:16:15.000, tinalo sina Jeanne Dominic Bongotan ng Baguio (2:17:07.827) at Zyrhed Pajas ng One Ilocos (2:22:57.508).
Sa boys’ 15-17 5-kilometer race naman, nagtala siya ng 1:03:41.303 upang manaig laban kina Pajas (1:03:52.895) at Giro Don Rafael Gito ng La Salle (1:04:21.967).
abilang din sa iba pang nagwagi sa iba’t ibang dibisyon sina Anton Della ng La Union, Marc Justin Yu ng Negros at Lyon Pascua ng One Ilocos sa boys’ 10km Under-20 category; Alexander Lawrence Yu ng All Star, Joshua Delmo ng Ayala Harpoon at Paulo Miguel Labanon ng Ayala sa 10km Over-20 class.
Nagwagi rin sina Alfonso Joaquin DeMesa, Rie Mones at Marcus Ubungen sa boys’ 5km 14-15 category; sina Marc Justin Yu, Lyon Pascua at Jan Pau Baulo sa boys’ 5km 18-19; at sina Paolo Miguel Labanon, Reiniel Lagman at Joshua Del Rio sa boys’ 5km 20-over division.
Sa girls’ events, nanguna sina Makayla Fetalvero, Raziel Villas at Maria Isabella Raagas sa 5km 14-15 category, habang sina Jie Angela Mikaela Talosig, Alexis Bailey Tan Uy at Amanda Tongson naman ang naghari sa girls’ 5km 20-over division.
Binati ni PAI Secretary General Eric Buhain ang lahat ng medalists at qualifiers at binigyang-diin ang kahalagahan ng tuloy-tuloy na pagsasanay bilang paghahanda ng pambansang koponan para sa mga darating na internasyonal na torneo.
“Ipinagmamalaki namin ang ipinakitang performance ng ating mga manlalangoy, lalo na nina Graziella at Rio na nagpakita ng determinasyon at konsistensya sa buong kompetisyon,” sabi ni Buhain. “Simula pa lamang ito ng aming paghahanda para sa Southeast Asian Open Water Championships. Patuloy naming bibigyan ng suporta at de-kalidad na training ang ating mga atleta upang makipagsabayan sa pinakamataas na antas ng kompetisyon.”
Nagpasalamat din si Buhain sa Speedo, MVP Sports Foundation, at sa Lokal na Pamahalaan ng Malay, Aklan sa pangunguna ni Mayor Floribar Bautista para sa kanilang suporta sa matagumpay na pagsasagawa ng torneo.
“Lubos kaming nagpapasalamat sa aming mga sponsors at sa lokal na pamahalaan ng Malay sa pagtulong upang maidaos ang isang world-class open water competition dito sa Boracay,” dagdag ni Buhain. “Napakahalaga ng kanilang suporta sa patuloy na pag-unlad ng Philippine aquatics at sa pagbibigay sa ating mga atleta ng pinakamahusay na kapaligiran upang maabot ang kanilang buong potensyal.” (PAI/HNT)
