HATAW! D'yaryo ng Bayan hatawtabloid.com
DINAKIP ng mga awtoridad ang isang indibiduwal na nakatala bilang most wanted person nang isilbi sa kaniya ang warrant of arrest sa Barangay Bulihan, Lungsod ng Malolos, lalawigan ng Bulacan, nitong Linggo, 7 Hunyo.
Ayon sa ulat ni P/Lt. Col. Rommel Geneblazo, hepe ng Malolos CPS, kinilala ang naarestong suspek na isang 40-anyos negosyante at residente sa nabanggit na barangay.
Dinakip ang suspek ng tracker team ng Malolos CPS sa bisa ng dalawang magkahiwalay na warrant of arrest para sa mga kasong paglabag sa RA 10883 o New Anti-Carnapping Act of 2016.
Ang unang warrant ay may kaugnayan sa Criminal Case No. R-QZN-22-01770-CR na inisyu ni Presiding Judge Maria Gilda T. Loja-Pangilinan ng Quezon City RTC Branch 230; habang ang ikalawang warrant ay may kaugnayan sa Criminal Case No. 22-78476 na inisyu ni Presiding Judge Rey Ranoco Lor ng Antipolo City, Rizal RTC Branch 138.
Dinala ang suspek sa Malolos CPS para sa kaukulang dokumentasyon at disposisyon.
Pahayag ni P/Col. Jay Baybayan, Officer-In-Charge ng Bulacan PPO, patuloy nilang paiigtingin ang operasyon laban sa mga most wanted person upang matiyak na mananagot sa batas ang mga indibidwal na may kinahaharap na kaso. (MICKA BAUTISTA)
