10 na patay sa gumuhong gusali sa Angeles City

UMABOT na sa 10 ang bangkay na nakuha ng mga search and retrieval team mula sa gumuhong itinatayong 9-storey building nang makarekober ng apat pang katawan kahapon sa Brgy. Balibago, Angeles City, Pampanga.

Sa ulat ng Angeles City Information Office, dakong 7:50 ng umaga nitong Linggo nang marekober ang ikapitong bangkay sa Quadrant 2 ng gumuhong gusali habang ang ika-walong bangkay ay nakuha dakong 2:51 ng hapon. Bandang 3:43 ng hapon at dakong 4:47 ng hapon kahapon nang mahukay rin ang ika-9 at ika-10 bangkay.

Agad isinailalim sa maingat na proseso ng pag-tag at dokumentasyon ng City Health Office sa naturang mga labi bilang bahagi ng mahigpit na ipinatutupad na Disaster Victim Identification (DVI) protocol upang matiyak ang tamang pagkakakilanlan sa mga biktima.

Sinabi ni Angeles City Mayor Carmelo “Jon” Lazatin II, iniulat din ng Unified Command na may natagpuang vaccination card sa lugar na may nakasulat na pangalan na posibleng makatulong sa pagkilala sa biktima.

Gayunman, inilinaw ng alkalde na patuloy pa itong sumasailalim sa masusing beripikasyon ng mga awtoridad at hindi pa maaaring ituring na opisyal na pagkakakilanlan hangga’t hindi nakokompleto ang mahigpit na proseso sa DVI.

Patuloy ang isinasagawang retrieval at clearing operations ng Unified Command sa gumuhong

9-palapag (under construction) noong 24 Mayo dakong 3:00 ng madaling araw sa nasabing lugar. (HNT)