Ambon ng The Sonnets emosyonal 

SHOWBIZ KONEK
ni Maricris Valdez

NAKABIBILIB na hindi lang si Atty. Rey Bergado ng Innervoices ang mahilig sa musika at may banda. Maging ang kanyang anak na sina Migo ng The Sonnets at Ronan ng 25 Abbey ay may kanya-kanyang banda at talaga namang magagaling ding kumanta at tumugtog ng instrumentong gamit nila sa kani-kanilang banda.

Noong May 21 narinig namin ang mga musika ng The Sonnets at 25 Abbey sa pagtatampok sa kanila sa UniversiTeen 2.0 ng Hard Rock Café Makati. At nagulat kami na may kanya-kanya at marami na rin silang followers.

Nakabibingi nga ang tilian, hiyawan, palakpakan ng mga follower na sumadya sa Hard Rock para marinigang kani-kanilang musika na puno ng energy, heartfelt lyrics, at emotionally charged sound.

Kasama ni Migo sa The Sonnets sina Annie at Joed. Umani sila ng malakas na hiyawan at palakpakam mula sa mga manonood habang ipinaririnig nila ang mga awiting nagpapakita ng kanilang signature blend ng emotion-driven alternative pop at modernong OPM storytelling. Isa sa nagustuhan ng mga nasa Hard Rock ang pagkanta nila ng inilunsad nilang single, ang Ambon na isa sa mga pinaka-hindi malilimutang sandaling gabi.

Mabilis kasing nakakonek ang audience sa liriko ng kanta na habang inaawit ng grupo ang Ambon ay tila hinehele kami dahil sa melancholic at healing message nito. 

Nakatutuwa ring makita na sumasabay ang audience sa pagkanta ng grupo.

Ayon kay Migo ukol sa Ambon, may malalim na personal iyong kahulugan.

“Gusto kong maramdaman ng mga tao na okay lang maging malungkot minsan. ‘Yung ‘Ambon,’ para siyang tahimik na sakit na unti-unti mong inilalabas habang nakikinig ka sa music,” wika ni Migo.

Ang emosyonal na katapatan sa likod ng track ay naging isa sa mga dahilan kung bakit ang mga tagapakinig ay nahilig sa The Sonnets. Ang kanilang musika ay hayagang tumutukoy sa dalamhati, kahinaan, pagpapagaling, at ang mga tahimik na emosyon na hindi mailahad — mga tema na malakas na sumasalamin sa henerasyon ng mga tagahanga ng musika ngayon.

Malaki ang pasaalamat ni Migo sa mga tumatangkilik sa The Sonnets. Nagpapasalamat siya sa lumalaking suporta na natatanggap ng banda habang mas maraming tagapakinig ang nakatutuklas ng kanilang musika online at sa kanilang  mga live performances.

“Sobrang thankful kami sa lahat ng sumusuporta sa amin,” anang frontman ng The Sonnets.

Kasunod nito ang paghikayat niya sa kanilang mga tagapakinig na i-stream ang bagong inilabas na single sa mga digital platform.

“Sana mapakinggan ninyo ang ‘Ambon’ sa Spotify at sa iba pang streaming platforms. Sabayan ninyo kami sa bawat breakdown at bawat emosyon ng kanta,” wika pa ni Migo.

Ang UniverTeen 2.0 ng paraan ng Hard Rock Café na buksan ang entablado nila para sa mga umuusbong na batang musikero. Una itong inilunsad noong nakaraang taon, ay idinisenyo upang bigyan ang Gen Z at mga banda na pinamumunuan ng mag-aaral ng isang lugar na maaari silang magtanghal bago ang mga live na madla at bumuo ng kanilang kompiyansa bilang mga artist.

“We are not closing our stage and feature just the well-known artists or established bands,” aniClint Brian Peck, direktor sa operasyon ng Hard Rock Café. “We want to open our stage to the young generations, the young performers.”

Sinabi pa ni Peck na ang inisyatiba ay naglalayong suportahan ang mga naghahangad na performer na naghahanap pa rin ng kanilang lugar sa lokal na industriya ng musika.

Aniya pa, umaasa ang Hard Rock na maging launchpad para sa susunod na wave ng mga Filipino musician.

“The campaign right now is ‘Support Local, Support OPM.’ We want to make the new bands part of the music at Hard Rock.”