HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez
INAMIN ni Joshua Garcia na hindi siya komportable o sanay sa mga eksenang love scene. Hindi rin siya sanay na naghuhubad sa harap ng kamera.
Ito ang ibinunyag ng aktor sa isinagawang Star Magic Spotlight Presscon kamakailan sa Dolphy Theater para na rin sa promosyon ng kanilang serye ni Ivana Alawi, ang Love Is Never Gonesa Prime Video.
Ani Joshua, 12 taon na siyang artista at sa dami ng mga nagawa niyang teleserye at pelikula, hindi pa rin siya sanay sa love scenes.
Naurirat ang aktor ukol sa maiinit nilang romansahan ni Ivana sa Love Is Never Gone. At dito nga siya umamin hirap siya sa paggawa ng maiinit na eksena.
“Actually hindi ako comfortable at all doing love scenes, like showing my body in front of the camera. Pero kasi roon nangagaling ‘yung pagiging actor mo.
“Uncomfortable talaga kasi, showing your body? Ang hirap niyon ha! Every time na may love scene ako kinakausap ko ‘yung mga cameraman namin. Sasabihin ko sa kanila, ‘Uy, iwasan mo ‘yung tiyan ko ha?’” nangingiting pagbabahagi ni Joshua.
“Ang gagawin niya naman kahit naririnig ko si Direk (Manny Palo), ‘Ibaba mo pa ‘yung camera, ‘yung angle mo, ibaba pa.’
“‘Yung cameraman matibay siya hindi niya talaga ibinababa. So, kapag ganoong scene, idinadaan ko muna sa mga cameraman,” aniya pa.
Kaya naman para hindi mahirapan sa mga intimate scene ni Ivana, isinapuso na lang niya ang pinanggagalingan ng character niya bilang si Theo.
“Inisip ko na lang na ako si Theo. Kasi every love scene naman may pinanggagalingan ‘yan eh, and ‘yung scene na ginawa namin bago mag-love scene, mahaba siya talaga although maikli lang ‘yung ipinakita,” esplika ng aktor.
Ibinuking pa ni Joshua na never silang nagkaroon ng meeting ni Ivana bago nagsimula ang serye kaya nakadagdag pa iyon ng kaunting ilang sa paggawa ng intimate scene.
