HATAW! D'yaryo ng Bayan hatawtabloid.com
NAGPATUPAD ang CIDG Northern Metro Manila District Field Unit kasama ang mga teritorial police units ng isang search warrant para sa paglabag sa RA 11592 o LPG Industry Regulation Act sa isang bodega Likod Bisita, Bgry. Loma de Gato, sa bayan ng Marilao, lalawigan ng Bulacan na nagresulta sa pagkakaaresto ng tatlong suspek, at pagkakakumpiska ng siyam na refilling head na may weighing scale at LPG hose, refilling hose, motor compressor, at cylinder tank (Phoenix) na tinatayang may kabuuang halaga na P1,360,000.
Ayon sa ulat na nakarating kay P/Maj. Gen. Robert Morico II, direktor ng CIDG, ang mga naarestong suspek na kinilalang sina alyas Tina, alyas Ram, at alyas Dan, pawang mga empleyado ng bodega, ay nahuli habang nagsasagawa ng mga operasyon ng pagkakarga ng mga produktong likidong petrolyo – nang walang pahintulot mula sa mga may-ari ng tatak ng LPG na nagpapahintulot ng refill cylinders, kaya nagiging ilegal ang kanilang operasyon.
Binigyang-diin ng direktor ng CIDG na patakaran ng estado na protektahan ang interes ng mga end-consumer, tiyakin ang kanilang pangkalahatang kapakanan, at magtatag ng mga pamantayan ng pag-uugali para sa negosyo.
Napag-alamang nasa ilalim ng RA 11592, ang pagpuno ng mga refill cylinders ng LPG nang walang pahintulot ng may-ari ng tatak ay ilegal.
Nilalayon ng batas na protektahan ang kaligtasan ng publiko, integridad ng produkto, at mga karapatan ng mga mamimili sa ilalim ng mga regulasyon ng LPG sa Filipinas.
Kasunod nito, pinuri ng pamunuan ng CIDG si P/Col. John KGuiagui, ang regional chief ng CIDG Regional Field Unit – NCR, at ang CIDG Metro Manila Northern District Field Unit, sa pamumuno ni P/Lt. Col. Benedick Poblete, para sa matagumpay na pagsugpo sa mga hindi awtorisadong operasyon ng pagpuno ng liquefied petroleum gas, at ang pag-aresto sa mga lumalabag sa batas.
Tinitiyak ng CIDG sa publiko ang matibay nitong pangako na ipatupad ang lahat ng batas at panatilihin ang agresibong kampanya laban sa lahat ng uri ng ilegal na aktibidad at kalakalan sa buong bansa. (MICKA BAUTISTA)
