HATAW! D'yaryo ng Bayan hatawtabloid.com
ALAM MO NA!
ni Nonie Nicasio
BUKOD sa mga bituin sa pinilakang tabing ang magniningning sa Camelot Hotel para sa 11th Inding-Indie Excellence Awards sa 24 Mayo 2026, isang mas malalim at mas makulay na visual art unveiling ang nakatakdang yumanig sa puso ng mga dadalo.
Ito ang eksklusibong painting exhibit ni Direk Ron Sapinoso, ang premyado at multi-awarded na founder ng Inding-Indie Film Production.
Ang pagtatanghal na ito ay hindi lamang isang simpleng pagdidikit ng pintura sa canvas, kundi isang banal na manipestasyon ng kanyang personal na pakikipagbuno at tagumpay laban sa mga hamon ng buhay.
Bilang isang natatanging alagad ng sining na may cerebral palsy, ang bawat hagod ng kanyang pinsel ay patunay na ang totoong talento ay walang limitasyon at ang sining ay isang unibersal na wika ng kalayaan.
Ang bawat obrang masisilayan sa kanyang exhibit ay nagtataglay ng kaluluwang sumisigaw ng pag-asa, pagkakaisa, at wagas na pag-ibig sa sining na tiyak na mag-iiwan ng malalim na marka sa sinumang titingin dito.
Hindi na bago ang pangalan ni Direk Sapinoso sa mundo ng sining dahil ang kanyang mga gawa ay matagumpay nang naitampok sa Metropolitan Theater, Gateway Mall, Eurotel Manila, at maging sa bansang Germany.
Sa pamamagitan ng makikinang at matatapang na kulay, kakaibang texture, at lalim, ginagamit niya ang canvas upang isagisag ang lakas ng komunidad ng mga PWD at Neurodivergent.
Ang pagmamay-ari ng kanyang painting ay nangangahulugan ng pag-angkin sa isang bahagi ng kanyang matatag na puso at pandaigdigang kalidad.
Ang bawat piraso sa koleksiyong ito ay sumasalamin sa limang pangunahing adbokasiya ng Inding-Indie, partikular na ang pagbibigay-dangal sa marginalized sectors.
Sa pamamagitan ng mga abstract at figurative na anyo, binibigyang-boses ng kanyang sining ang pakikibaka ng mga kababaihan, kabataan, kahalagahan ng mental health, at ang bayanihan sa mga maralita. Ang kanyang mga dinamikong stroke ay may mataas na artistic value kung saan ang bawat pigment at espasyo ay may malalim na layunin at katotohanan.
Ang pagbili sa mga obra ni Direk Ron Sapinoso sa gabi ng unveiling ay isang pambihirang pribilehiyo at direktang pakikibahagi sa isang dakilang humanitarian movement.
Ang pondong malilikom ay gagamitin para sa PWD na si Sapinoso at para sa kanyang humanitarian advocacy na makabuo ng pag-asa na tahanan sa simbahan.
Huwag palampasin ang pagkakataong ito sa 24 Mayo sa Camelot Hotel upang magmay-ari ng isang “Sapinoso Original” — isang obra maestrang simbolo ng marangyang panlasa at pusong tumutulong.
